Զալցբուրգի բժշկական ծրագրերը` հայ բժիշկների համար մասնագիտական մեծ հեռանկարների երաշխիք. Հայաստանում էր դոկտոր Ռասուել Ուինդսորը

Վնասվածքաբանների-օրթպեդների VI համագումարի շրջանակում Հայաստանում էր Զալցբուրգի բժշկական ծրագրերի շրջանակում վնասվածքաբանության և օրթոպեիդայի սեմինարների կուրսի ղեկավար դոկտոր Ռասուել Ուինդսորը:

Զալցբուրգի բժշկական ծրագրերի, այդ ծրագրերին հայ բժիշկների մասնակցության և թեմային հարող այլ հարցերի շուրջ զրուցեցինք Հայաստանում Զալցբուրգի բժշկական ծրագրերի համակարգող Բելլա Գրիգորյանի հետ:

–   Տիկին Գրիգորյան, ի՞նչ է իրենից ենթադրում Զալցբուրգի բժշկական ծրագիրը, ինչպիսի՞ն է Հայաստանի մասնակցությունը ծրագրին: 

–   Զալցբուրգի բժշկական ծրագիրը Հայաստանում գործում է 1996 թվականից: Մենք ունեցել ենք 800-ից ավելի մասնակից՝ տարբեր մասնագիտություններով: Զալցբուրգի ծրագիրը ենթադրում է 7-օրյա դասախոսություններ ԱՄՆ-ի լավագույն բժշկական կենտրոնների մասնագետների կողմից: Դասախոսությունների մասնակիցները հիմնականում արևելյան եվրոպայից և հետսովետական երկրներից են: Առավոտյան ժամը 9-ից մինչև երեկոյան 8-ը մասնակիցներն անընդհատ դասախոսություններ են լսում և տարբեր կլինիկական դեպքեր քննարկում: Կա ծրագրի 2-րդ աստիճանը` observership, երբ մասնակիցը 1-3 ամիս Ավստրիայի հիվանդանոցում աշխատում է տեղի բժիշկների հետ: Մենք ունենք շուրջ 200 մասնակից, ովքեր ունեցել են այդ պրակտիկան, ստացել ամենաանհրաժեշտ փորձն ու գիտելիքները հենց հիվանդանոցում՝ հիվանդի հետ աշխատելիս:

–   Ի՞նչ ձեռքբերումներ, հնարավորություններ է տալիս ծրագիրը մասնակցին:

–   Հնարավորություն է տալիս ստանալու նոր գիտելիքներ, ստեղծել հրաշալի կապեր Միացյալ նահանգների և Եվրոպայի բժիշկների հետ, օնլայն մուտք ունենալ տարբեր սեմինարների, զգալ ամբողջ աշխարհի բժիշկների մեծ ընտանիքի անդամ:

–   Մանրամասնեք, խնդրե՛մ, ծրագրի տեխնիկական մասի մասին: Ովքե՞ր կարող են մասնակցել ծրագրին և արդյո՞ք վճարովի է ծրագիրը:

–   Մասնակիցների համար ծրագիրն ամբողջովին անվճար է, ֆինանսական բոլոր ծախսերը հոգում է AAF ավստրիական ընկերությունը: Ցանկացած բժիշկ, ով ավարտել է բարձրագույն բժշկական հաստատությունը և ունի բժշկի մասնագիտական դիպլոմ (բուժական գործ), կարող է դիմել ծրագրին: Միակ նախապայմանը անգլերենի լավ իմացությունն է, քանի որ մասնակիցները պարտադիր հանձնում են անգլերեն քննություն: Դիմում են ամենապարզ ճանապարհով` համացանցով: Պետք է պարզապես լրացնել դիմումը և մասնակցել անգլերենի իմացությունը ստուգող քննությանը, որն անց է կացնում անկախ մասնագետն ԱՄՆ-ից: Ստացված արդյունքներն ուղարկում ենք Ավստրիա, որտեղ տեղի մասնագետներն ընտրում են, թե ովքեր կմասնակցեն Զալցբուրգի սեմինարներին:

Զալցբուրգի բժշկական ծրագրի մասին ավելի մանրամասն զրուցեցինք Ազգային մրցունակության հիմնադրամի բժշկական ծրագրերի ղեկավար, 1998թ. վնասվածքաբանության և օրթոպեդիայի զալցբուրգյան սեմինարների շրջանավարտ Գևորգ Յաղջյանի հետ:

–   Պարոն Յաղջյան, Հայաստանն ակտիվորեն ներգրավված է Զալցբուրգյան բժշկական ծրագրերին, դրա ապացույցն է նաև դոկտոր Ուինդսորի մասնակցությունն այս համագումարին…

–   Այո՛, օգտվելով առիթից` Հայաստան ենք հրավիրել Զալցբուրգի բժշկական ծրագրերում ներառված  վնասվածքաբանության և օրթոպեիդայի սեմինարների կուրսի ղեկավար դոկտոր Ուինդսորին և հանդիպում կազմակերպել այն 30 մասնագետների հետ, ովքեր մասնակցել են, մասնավորապես, վնասվածքաբանության և օրթոպեիդայի սեմինարներին: Սեմինարներին մասնակից-շրջանավարտները հանդիպման ընթացքում կիսվեցին իրենց հաջողությունների, մասնագիտական  մակարդակի այն վերելքների մասին, ինչին հասել էին վերապատրաստումներից ի վեր: Դոկտոր Ուինդսորը, Զալցբուրգի բժշկական ծրագրերում իր կարևոր ներդրումից զատ, միաժամանակ ԱՄՆ-ի Ծնկահոդի խնդիրների ընկերության նախագահը և Ամերիկայի լավագույն օրթոպեդիկ հիվանդանոցի` «Hospital for special surgery»-ի ծնկահոդի խնդիրներում մասնագիտացված բաժանմունքի ղեկավար ն է: Հարկ եմ համարում առանձնացնել, որ այս բաժանմունքի բժիշկները ո՛չ միայն Նյու Յորքի, այլև ամբողջ Ամերիկայի լավագույն մասնագետներն են, ինչի վառ ապացույցն է  բաժանմունքի մասնագետների կողմից Ամերիկայի սպորտային օլիմպիկ թիմի բժշկական սպասրկման փաստը:

–   Ի՞նչ հնարավորություններ է տալիս Զալցբուրգի ծրագիրը մասնակից բժիշկներին:

–   Բացի տեսական և պրակտիկ գիտելիքներից, այժմ ծրագիրը հնարավորություն է տալիս նաև հետազոտական ծրագրեր անցկացնել ավստրիական առաջատար գիտահետազոտական հաստատություններում:

–   Դոկտոր Ուինդսորի այցի նպատակների մասին մանրամասնեք, խնդրե՛մ…

–   Առաջին հերթին սա հանդիպում էր դոկտոր Ուինդսորի և նրա կողմից իրականացված սեմինարներում իրենց մասնակցությունը ցուցաբերած բժիշկների միջև: Հանդիպման ընթացքում քննարկվեցին, թե ինչ հեռանկարներ կարող են ունենալ ծրագրի մասնակիցները, իսկ սեմինարների շրջանավարտները ներկայացրեցին իրենց ընթացիկ աշխատանքային ձեռքբերումներն ու արդյունքները: Ի դեպ, Հայաստանը Զալցբուրգի սեմինարներին իր մասնակցության թվով՝ այլ երկրների համեմատությամբ, առաջին հորիզոնականում է:

Դոկտոր Ուինդսորի համագումարին մասնակցությունը նաև առիթ էր, որ մեր բժիշկները հնարավորություն ունեցան հենց մեր երկրում լսելու նրա դասախոսությունները: Հայաստանում նրա հետ հանդիպման ոչ պակաս կարևոր նպատակը «Hospital for special surgery»-ի և մեր վնասվածքաբանության ու օրթոպեդիայի ինստիտուտի միջև համագործակցության հաստատումն է:

Դոկտոր Ուինդսորը Հայաստանում գտնվելու օրերին այցելել է «Էրեբունի» բժշկական կենտրոնի վնասվածքաբանության և օրթոպեդիայի բաժանմունք և հասցրել խորհրդատվություն անցկացնել մի քանի խնդրահարույց պացիենտների բուժման կազմակերպման հարցերի շուրջ:

–   Ի՞նչ է տալիս այս ծրագիրը մեր բժիշկներին:

–   Ամենակարևոր ձեռքբերումն այս ծրագրի շրջանակում գիտելիքն է: Պակաս կարևոր չեն մասնագիտական կապերը: Նրանք ծանոթանում են այլ երկրների օրթոպեդների հետ, ում հետ քննարկում են ուշագրավ կլինիկական դեպքեր: Նրանք հնարավորություն են ստանում 3 անգամ մեկ ամսով իրենց վերապատրաստումն անցնելու Վիեննայի հիվանդանոցներում:

Հարցեր, պատասխաններ, մեկնաբանություններ